कपिल सरोवर नाम, कलियुग तीरथ थापियो

कपिल सरोवर नाम, कलियुग तीरथ थापियो । देश फलोदी मांय, भाग परापति पावियो । भाग परावति पावियो नै, कृपा करी जगदीश । आदू तीर्थ प्रगट कियो, सही विसवा वीस । कपिल मुनि तपै यहां नै, तपै ऋषेश्वर जोग । जम्भसरोवर नाम अब, परगट कह सब लोग । कलियुग तीरथ थापियो ।१।

दवापर जुग के मांय, बहु जिग कर हरि पूजियो । पांडू परमारथ रूप, वेद व्यास जी नै पूछियो । वेद व्यास जी नै पूछियो नै, थे कृपा करो भगवान । दिव्य दृष्टि है आपकी, म्हां सूं कहो बखाण । ऐसो तीर्थ जगत में, जहां अनंत गुणो फल होय । जिहिं तीर्थ म्हे जिग करां, म्हारी मनसा पूर्ण होय । वेद व्यासजी नै पूछियो ।२।

कलियुग मंझ के मांय, पाप पूरे जग छावसी । तीर्था रो घटे प्रभाव, दसो दिस दोष दरसावसी । दसो दिस दोष दरसावसी नै, धरम हीण संसार । श्रुति पुराण भागवत को, मानें नहीं लिंगार । धर्म अंग राजा हुवै, पूछे श्रुति विचार । गोप तीर्थ प्रगट कियो, महिमा बधे अपार । घर घर मंगल छावसी ।३।

कपिल सरोवर नाम, कृत जुग में कह भाखियो । तीर्थ अधिक अनूप, वेद व्यास जी नै यूं आखियो । वेद व्यासजी नै यूं आखियो नै, पांडू चल्या परदेश । यज्ञ करण के कारणै, आया बागड़ देश । विविध भांति सूं यज्ञ कियो, उतम तीर्थ जांण । हेत करि हरि पूजियो, पांडू परम सुजाण । जम्भेश्वर यूं आखियो ।४।

तीर्थ जाम्भोलाव, हेत कर जहां जावियो । हरष करे कर कोड, जांण र गंगा न्हाविये । जांण गंगा न्हाण कीजै, माटी सूं चित लाय । निसार माटी करो पूजा, निंवत संत जिमाय । विष्णु मन्दिर होम कीजै, परिक्रमा करि प्रीत । साखी हरजस सबद गावै, कर कर उत्सव रीत । श्री जाम्भेश्वर गुण गाविये ।५।

तीरथ बड़ो तालाब, जहां जाय सूत फिराविये । भाव भगति मन सार, सहंस गुणों फल पाविये । सहंस गुणों फल पाविये नै, जो सेवे मन कांम । सायुज्य मुक्ति मिले, पावै मन विश्राम । अड़सठ तीर्थ उपरा, जम्भ सरोवर धाम । श्री जाम्भोजी की कृपा से, वरणत गोविन्द राम । जहां जाय सूत फिराविये ।६।