गाओ गाओ ए सहियां म्हारी गीतड़ला

गाओ गाओ ए सहियां म्हारी गीतड़ला, मुरली गाओ ए मुकाम। सुणेला थारी जाम्भोजी । टेर ।

गढ़ चितौड़ां ए जाम्भोजी पधारिया, झाली राणी रो दु:ख दियो मेट । सुणेला थारी जाम्भोजी । 1।

सांसा जिणरा ए पल मांही काटिया, सुण जाम्भोजी ग्यान । सुणेला थारी जाम्भोजी । 2।

रावण गोविन्द ए जलरा प्यासिया, बादल दियो बरसाय । सुणेला थारी जाम्भोजी । 3।

शहर फलोदी रा ए राव हमीरजी, ज्यांरी दीन्हीं तपत बुझाय । सुणेला थारी जाम्भोजी । 4।

वील्हो खाती ए रेवाड़ी शहर रो, ज्यांरो कंचन कियो शरीर । सुणेला थारी जाम्भोजी । 5।

बाजेजी भगत रो ए दुखड़ो निवारियो, बेटो दियो जवान । सुणेला थारी जाम्भोजी । 6।

अलू चारण री ए व्यथा मिटाय दी, ज्यांरो काट्यो जलोदर रोग । सुणेला थारी जाम्भोजी । 7।

सिरिया झमकू ए जाम्भेजी री चेलियां, ज्याने सुरगां दी पंहुचाय । सुणेला थारी जाम्भोजी । 8।

इण तीन लोक में ए बाने मत भूलज्यो, घर-घर करो प्रचार । सुणेला थारी जाम्भोजी । 9।

अमर सुहागण ए जाम्भेजी राखेला, भरिया राखेला भण्डार । सुणेला थारी जाम्भोजी । 10।

गावे ज्यारां ए पाप झड़ पड़ै, आवागवण मिट जाय । सुणेला थारी जाम्भोजी । 11।

हरजस कथियो ए सुरजाराम ने, राख पूरो विश्वास । सुणेला थारी जाम्भोजी । 12।