उतर दिसा दोय मोमण आया,

उतर दिसा दोय मोमण आया,

घर पुछा वै रूड़े साधा को

ऊंचो मरवौ बारी विजौरो जी,

ओ घर रूड़ै साध को ।

पुछत पुछत साधु जण आया

हेत कर मिलो सती आमैणी

मनसा भोजन इमरत मेवा,

प्रीति पलंग बिछाणी ।

पाड़ोसण पूछै कूंण ज आया जी,

किंण नाते कुंण पाहुणां

आमैणी कहे म्हारे गुरु को नातो जी,

साधु ये आया म्हारे पाहुणां ।

लेहनी पाड़ोसण पांव री हे पायल,

म्हारी तो सासू आगल मत कहै

थांरी तो पायल थेई ज पहरोजी,

म्हारी तो अलवी बहनड़ ना रहै

लेवैनी पड़ोसण हाथ रो हे मूंदड़ो,

म्हारा तो छंदा बहनड़ ना रहै

थारो मूंदड़ो साथे ईज पहरोजी,

म्हारी नीमांड़ी बैहनड़ ना रहै ।

लेवेनी पाड़ोसण सीस री हे चूंदड़ी,

म्हारा तो छंदा बैहनड़ छायले

थांरी तो चूंदड़ी थे इज ओढ़ोजी,

म्हारी निसरमी बैहनड़ ना रहै ।

लेवेनी पाड़ोसण गलै रो हे वाल,

म्हारी बडेरी आगल मत कहै

थांरो हे वाल थे इज राखो जी,

म्हारी अलवी बैहनड़ ना रहै ।

न जाणौं चोर थांनै जाणूं साध थांनै,

तारा उगौणां दोय जणा मोकला

काला बलदां पुता बहल जुपाड़ोजी,

घरां निकालो बहु आमैंणी ।

आवैलो बेटो कड़िया लीयोजी,

नींबोल गायो सती आगली

निबलो बेटो भूखो हुवो जी,

खोखा खिर धरती पड़या ।

आवैलो बेटो तिसायो हुवोजी,

सूका सर पाणी छल्या

माया हुती सा तो कोयला हुई जी,

रिध सिध लेगी बहु आमैणी ।

धोलां बलदां पुतां वाहल जुपाड़ोजी,

पाछी लियाओ बहू आमैणी

धरती माता तो हार जे दीन्होजी,

धरां समांणी सती आमैणी ।

स्वर्गापुर मां हुई बधाई,

स्वर्गा पहुंची सती आमैणी

जैसो कमावो तैसो फल पावे,

कुमाई लहै छै आपो आपणी ।