पतवो लिखदे जी हो ब्राह्मणां, कह ऊधो समझाय

पतवो लिखदे जी हो ब्राह्मणां, कह ऊधो समझाय

तुम बिन दूभर जीयो द्योसड़ो( देशड़ो), हरि बिन रह्यो न जाय ।

कह जन ऊधो गोविन्द कब मिलै, वृन्दावन रो राव

रंग रो वीनइयो नंदलाल जांणोजी, श्रीरंग मिलाव ।

ऊधो माधोजी सूं यों कह, ऐसी कछू हमें न सुहाय

वीठला बहु दिन जीहो लाविया, रह्यो द्वाराका छाय ।

मोहनी मूरति जीहो माधवा, चतुर्भुज बसियो म्हारे चीत

देखो भाई नागर नंद रो कान्हवो, सगुण श्यामजी सूं प्रीत ।

सो संभर सो मथुरा द्वाराका, सब रंग जंभ अचंभ

कामणगारो है कान्हवो, पियो म्हारो पारब्रह्म ।

देखो भाई नागर नंद रो कान्हवो, चंचल चतुर सुजान

मेरोमन लागो हरिजी श्याम सूं,जाको हर मुरली सूं धयान ।

हरजी रा मीठा मीठा बोलणा, ओ म्हारे जीवड़े रो मूल

तन मन भक्तां सेती रम रह्यो, भेद न जाणै मूरखो थूल ।

गोकुल केरो जीहो ग्वालियो, ओ छै म्हारै जीवड़ रो आधार

सोला सहस्त्र गोपियां में, रह्यो छै बालमियों ब्रह्मचार ।

मेलो कीजै मन रा माधावा, तेरा जन कोड कराय

वां मिलियां हम जीवैं, बिन मिलियां मर जांय ।

बाल स्नेही म्हारो सायबो, अति ही पियारो पीव

हरि मुख देखण के कारणै, तलफत म्हारो जीव ।

देखो भाई नागर नंद रो कान्हवो, पियो मेरो परम दयाल

'आलम' प्रभुजी रो लाडलो, गिरधारलाल गवाल ।