सेवगां सतगुरु बूझियो, तीर्थ कता कहावै

सेवगां सतगुरु बूझियो, तीर्थ कता कहावै । कवन तीर्थ जाय न्हाइये, जां सूं पाप दुरावै । पाप दुरावै सो किसो तीर्थ, गंगा यमुना सरस्वती । प्रयाग काशी अवध मथुरा, सेंतु बन्ध द्वारावती । जगन्नाथ केदार बद्री, ओर पुष्कर न्हाइये । मुक्त हुवै सो किसो तीर्थ, सतगुरु हमें बताइये ।१।

जम्भेश्वर यूं भाखियो, तीर्थ कहूं बखाणों । अड़सठ तीर्थ है सही, जामें फेर न जाणों । जामें फेर न जांणों, हृदय तीर्थ न्हाइये । दान दीजै देह छीजै, फिर फिर पांव घसाइये । अड़सठ महातम मिले इत ही, शुभ धाम परसाद सूं । देश फलोदी मंझ तीर्थ, बागड़ मध्य बताव सूं ।२।

इण भोमि में कोई जीव तिरयो, तहां को भेद बतावो । भेद बतावो कुण पार पहुंच्यो, कोई जीव स्वर्गे गयो । आ भोम सिद्ध कही तुम ही, और प्रगट किणी न कहयो । वेद पुराण में नहीं संख्या, ऋषिवरां छानो क्यों रही । चार जुगां में नहीं चावी, भोम पावन किण विध भई ।३।

ब्रह्म सरोदक तीर्थ हुंवतो, सातवें कल्प के मांही । वहां ब्रह्मा ने यज्ञ रच्यो, पावन रिज तांकी छांही । सहंस अठयासी ऋषिवर आये, मारकण्डेय दत लोमियो । खट् मास तक यज्ञ रच्यो, वेदी परनाले घी होमियो । देव महेश सुरपति आये, आये विष्णु साथ ही । ब्रह्म सरोदक तीर्थ हुंवतो, सातवें कल्प की बात कही ।४।

होमायत दस मास भई दुजे जिग, सुरपति देव तणां व्योहारा । होमें घृत भगवान तिरपत, होम्यां ही घृत अपारा । होम घृत अपार जिग में, देव मुनि जय जय करे । शंख धुनि सुर पुष्प वर्षा, गन्धर्व गुण गायन करे । कंचन कलश चौक पुरायो, ब्रह्मा भेद विचारियो । शुद्ध भोम अरू भेद विचार, सतगुरु शंकर यज्ञ रचावियो ।५।

तीजो जिग पाण्डवां कीयो, कीवी सामग्री तैयारी । सुरनर सुरपति आविया, आयो कृष्ण मुरारी । कृष्ण आये जिग थाये, होम विद वेदी रची । ब्रह्मा धुनि मुख वेद उचारे, वेद व्यास श्रीमद् वची । मास अठारह भई होमायत, तीन लोक तिरपत भये । पंचायन कृष्ण पुर्यो, पांण्डवां जिग पूर्ण भये ।६।

एक ही कल्प तीनों भये, दतात्रेय भगवान भणीजै । एक ही कल्प सनकादिक अरू, कपिल देव कल्प गिणीजै । कल्प एक कपिल गिणीजै, थे तीनों एक कल्प । ऐसे दो कल्प भये, तीजा वर्तमान कल्प । चार कल्प तक रहयो ऊजड़, ये सात कल्प मानियो । वेद पुराण को भेद नांही, भेद सतगुरु जानियो ।७।

इण कल्प के वर्तमान में, सतयुग बात संभारियो । सरस्वती आवत देखा, ब्रह्मा कुदृष्टि निहारियो । कुदृष्टि निहार्यो हर चक्र मार्यो, विधि मस्तक शंकर हन्यो । ता पाप से एक चक्र लाग्यो, ब्रह्म हत्या पराछित बन्यो । विचरत शिव इण भोम आये, खोद भोम आश न करयो । रिज पावन लगी कर से, शंकर कर चक्र झड़यो ।८।

रजपूत बसै पड़ियाल में, कलयुग कथा संभारियो । उनकी त्रिया दुःशीलनी, जिन कंत कटारी मारियो । मार कंत संग और ध्यायी, जिन छोड़यो चित्रंग ताल में । कर से ही खवामण कीनो, बैठी दुख हवाल में । जेठ वदि की बीज बृहस्पति, भई वर्षा भारिया । रिज पावन लगी कर से, कर सूं झड़ी कटारियां ।९।

कियो मनोरथ उतम भोम कूं, रथ चढ़ जम्भ पधारे । एक सहंस अरू सात सौ, साधु संत जन सारे । साधु संत संग गुरु गवन कीनो, खींदासर वासो लियो । दिन दूजे इन भोम संता, आय तट डेरो कियो । षट् मास तक रहयो आसन, जहां थापी सतगुरु साथरी । नर नारी माटी सबही काढ़े, जुड़या जमाती जातरी ।१०।

सेवगां सतगुरु बूझियो, इण तीर्थ जल क्यों खारो । जम्भेश्वर यूं भाखियो, इनको सुणो विचारो । सुणों विचार जद समंद मथियो, शेष नाग नेतो गहयो । चवदै रतन काढ़ लिया, समंद जल खारो भयो । मंथन करता नीर उछल्यो, केई जोजन अलगो गयो । जहां पड़यो तहां खार प्रगट्यो, यो जल खारो यूं भयो ।११।

पनरासै छयासठे, अगहन पख आधार । पुख नखतर अरू पंचमी, वृहस्पति वार सुवार । ता दिन नींव तालाब तीर्थ, देव हुकम ओदी दई । ओ धाम ऐसो मुक्त पावो, श्री जम्भेश्वर यूं कही । हवन प्रतिष्ठा करि पूजन, गोप प्रगट यूं दाखियो । तीर्थ विगत तालाब महातम, वील्हाजी से केशव सुण भाखियो ।१२।